ಬಹುತೇಕರಿಗೆ ವಾಹನವೆಂದರೆ ಅಚ್ಚುಮೆಚ್ಚು. ಜಗತ್ತಿನಲ್ಲಿಂದು ವಾಹನ ಬಳಸುವವರು ಸಂಖ್ಯೆ ಗಮನಾರ್ಹವಾಗಿ ಏರಿಕೆ ಕಾಣುತ್ತಿರುವುದರಿಂದ ಈ ಕ್ಷೇತ್ರದಲ್ಲಿಉದ್ಯೋಗಾವಕಾಶವೂ ಹೆಚ್ಚಾಗುತ್ತಿದೆ. ವಾಹನ ಇಷ್ಟಪಡುವವರಿಗೆ ವಿವಿಧ ಬಗೆಯ ಉದ್ಯೋಗಗಳೂ ಇಂದು ಲಭ್ಯ ಇವೆ. ಅಂದರೆ, ಸೈಕಲ್‌ ಪಂಕ್ಚರ್‌ ಹಾಕುವವರಿಂದ ಲಂಬೋರ್ಗಿನಿ, ಫೆರಾರಿ ಕಾರು ಮೆಕ್ಯಾನಿಕ್‌ವರೆಗೆ ವಿವಿಧ ಬಗೆಯ ಉದ್ಯೋಗಗಳು ಕಾಣಸಿಗುತ್ತವೆ. ಆಟೋಮೋಟಿವ್‌ ವಿಭಾಗದ ಕೆಲವು ಉದ್ಯೋಗಗಳ ಮಾಹಿತಿ ಇಲ್ಲಿದೆ.
ಆಟೋಮೊಬೈಲ್‌ ವಿನ್ಯಾಸಕರು: ನಿಮ್ಮ ಕನಸಿನ ಕಾರನ್ನು ವಿವಿಧ ರಚನೆಗಳ ಮೂಲಕ ವಿನ್ಯಾಸ ಮಾಡುವ ಕೆಲಸ ಮಾಡಬಹುದು. ಈ ಉದ್ಯೋಗದಲ್ಲಿನಿಜವಾದ ಕಾರಿನ ಜೊತೆಗೆ ಕೆಲಸಕ್ಕಿಂತ ಕಾಗದ, ಡ್ರಾಯಿಂಗ್‌ ಕೆಲಸ ಹೆಚ್ಚಿರುತ್ತದೆ.
ಟೆಕ್ನಿಷಿಯನ್‌/ಮೆಕ್ಯಾನಿಕ್‌: ವಾಹನ ಟೆಕ್ನಿಷಿಯನ್‌ಗಳಿಗೆ ಕಾರು/ಬೈಕ್‌ಗಳ ಜೊತೆ ಉತ್ತಮ ಸಂಬಂಧವಿರುತ್ತದೆ. ತಮ್ಮ ಅಚ್ಚುಮೆಚ್ಚಿನ ಕಾರುಗಳ ರಿಪೇರಿ ಮಾತ್ರವಲ್ಲದೆ ಡ್ರೈವ್‌ ಸಹ ಮಾಡಬಹುದು.
ಯಾವುದಾದರೂ ಮೆಕ್ಯಾನಿಕಲ್‌ ವಿದ್ಯಾರ್ಹತೆ ಹೊಂದಿರುವವರು ಅಥವಾ ಯಾವುದೇ ಹೊಂದಿಲ್ಲದೆ ರಿಪೇರಿ ಕೌಶಲ ಕಲಿತವರು ಮೆಕ್ಯಾನಿಕ್‌ ಆಗಿ ಜೀವನ ರೂಪಿಸಬಹುದು. ವಾಹನಗಳ ಸಂಖ್ಯೆ ಹೆಚ್ಚಿರುವುದರಿಂದ ಮೆಕ್ಯಾನಿಕ್‌ಗಳಿಗೆ ಬೇಡಿಕೆ ಉತ್ತಮವಾಗಿದೆ.
ಆಟೋಮೋಟಿವ್‌ ಎಂಜಿನಿಯರ್‌: ಕಾರು ವಿನ್ಯಾಸ ಮತ್ತು ನಿರ್ಮಾಣ ಸಮಯದಲ್ಲಿಕಾರಿನ ಸುರಕ್ಷತೆ, ಸೌಂದರ್ಯ, ಇಂಧನ ದಕ್ಷತೆ ಇತ್ಯಾದಿ ವಿಷಯಗಳತ್ತಲೂ ಗಮನ ನೀಡಬೇಕು. ಪ್ರತಿವಾಹನವನ್ನು ಪ್ರಗತಿ ಮಾಡಲು ಆಟೋಮೋಟಿವ್‌ ಎಂಜಿನಿಯರ್‌ಗಳ ಕೊಡುಗೆ ಹೆಚ್ಚಿರುತ್ತದೆ.
ಶೋರೂಂ/ಮಾರಾಟದ ಉದ್ಯೋಗ: ಕಾರು ಶೋರೂಂಗಳಲ್ಲಿಯೂ ವಿವಿಧ ಹಂತದ ಉದ್ಯೋಗಗಳು ದೊರಕುತ್ತವೆ. ಅಂದರೆ, ಟೆಕ್ನಿಷಿಯನ್‌, ಮ್ಯಾನೇಜರ್‌ ಇತ್ಯಾದಿ ಹುದ್ದೆಗಳು ಇರುತ್ತವೆ. ಕಾರು ಮಾರಾಟ ಮಾಡುವ ವಿವಿಧ ಹುದ್ದೆಗಳೂ ಲಭ್ಯ ಇವೆ. ಅಂದರೆ, ಸೇಲ್ಸ್‌ ಮ್ಯಾನೇಜರ್‌, ಸೇಲ್ಸ್‌ ಎಕ್ಸಿಕ್ಯುಟಿವ್‌ ಇತ್ಯಾದಿ. ಕಾರ್‌ ಮಾರಾಟ ತಂಡದೊಂದಿಗೆ, ಇನ್ವೆಂಟರಿ ವಿಭಾಗದ ಜೊತೆ ಕಾರ್ಯನಿರ್ವಹಿಸಬೇಕು.
ಕಾರು ಬೈಕ್‌ ಶೋರೂಂಗಳಲ್ಲಿವಾಹನ ಮಾರಾಟ ಮಾಡುವ ಉದ್ಯೋಗವು ಬಹುತೇಕರಿಗೆ ಅಚ್ಚುಮೆಚ್ಚು. ನಿಮ್ಮ ಆಸಕ್ತಿಗೆ ತಕ್ಕಂತೆ, ಪ್ರತಿಭೆಗೆ ತಕ್ಕಂತೆ ವಿವಿಧ ವಾಹನ ಕಂಪನಿಗಳ ಶೋರೂಂಗಳಲ್ಲಿಕಾರ್ಯನಿರ್ವಹಿಸಬಹುದಾಗಿದೆ. ಅಂದರೆ, ಹೋಂಡಾದ ಕಾರು ಶೋರೂಂನಲ್ಲಿಯೂ ಕಾರ್ಯನಿರ್ವಹಿಸಬಹುದು ಅಥವಾ ಮರ್ಸಿಡಿಸ್‌ ಶೋರೂಂನಲ್ಲಿಯೂ ಕಾರ್ಯನಿರ್ವಹಿಸಬಹುದು.
ಚಾಲಕರು: ವಾಹನ ಚಾಲಕರಾಗಿಯೂ ಸಾಕಷ್ಟು ಜನರು ಉತ್ತಮ ಜೀವನ ನಡೆಸುತ್ತಿದ್ದಾರೆ. ಸಾಮಾನ್ಯ ಚಾಲಕರಾಗುವುದು ಮಾತ್ರವಲ್ಲದೆ, ರೇಸಿಂಗ್‌ ಕಾರುಗಳಲ್ಲಿಚಾಲನೆ ಮಾಡುವ ಉದ್ಯೋಗವನ್ನೂ ಮಾಡಬಹುದಾಗಿದೆ. ಕಾರು/ಬೈಕು ಇಷ್ಟಪಡುವವರಿಗೆ ಚಾಲಕರಾಗುವುದಕ್ಕಿಂತ ಉತ್ತಮ ಉದ್ಯೋಗ ಬೇರೊಂದಿಲ್ಲ.
ವಾಹನತಜ್ಞರು: ವಾಹನಗಳ ಕುರಿತು ವಿಮರ್ಶೆ, ಟೆಸ್ಟ್‌ ಡ್ರೈವ್‌ ರಿಪೋರ್ಟ್‌ ಇತ್ಯಾದಿಗಳನ್ನು ಬರೆಯುವ ತಜ್ಞ ಬರಹಗಾರರು ನೀವಾಗಬಹುದು. ಪ್ರಮುಖ ಆಟೋಮೊಬೈಲ್‌ ನಿಯತಕಾಲಿಕೆಗಳಲ್ಲಿ, ಆಟೋಮೊಬೈಲ್‌ ಪೋರ್ಟಲ್‌ಗಳಲ್ಲಿಉದ್ಯೋಗ ಪಡೆಯಬಹುದಾಗಿದೆ.
ಮಾಡೆಲ್‌ ಅಥವಾ ರೂಪದರ್ಶಿ: ದುಬಾರಿ ಕಾರುಗಳ ಮುಂದೆ ನಿಂತ ಬೆಡಗಿಯರ ಚಿತ್ರಗಳನ್ನು ನೀವು ನೋಡಿರಬಹುದು. ಮಾಡೆಲಿಂಗ್‌ ಕ್ಷೇತ್ರಕ್ಕೂ ವಾಹನ ಕ್ಷೇತ್ರಕ್ಕೂ ನಂಟಿದೆ. ಹೀಗಾಗಿ, ಮಾಡೆಲಿಂಗ್‌ ಮೂಲಕವೂ ವಾಹನ ಕ್ಷೇತ್ರವನ್ನು ಪ್ರವೇಶಿಸಬಹುದಾಗಿದೆ.
ಅಸೆಂಬ್ಲಿಯನ್‌: ವಿವಿಧ ವಿದೇಶಿ ಕಂಪನಿಗಳು ಭಾರತಕ್ಕೆ ಕಾರುಗಳ ಬಿಡಿಭಾಗಗಳನ್ನು ರಫ್ತು ಮಾಡಿ ಇಲ್ಲಿಜೋಡಿಸಿ ಮಾರಾಟ ಮಾಡುತ್ತವೆ. ಈ ರೀತಿ ಅಸೆಂಬಲ್‌ ಅಥವಾ ಜೋಡಣೆ ಮಾಡುವ ಉದ್ಯೋಗಿಗಳಿಗೂ ವಾಹನೋದ್ಯಮದಲ್ಲಿಬೇಡಿಕೆಯಿದೆ.
ಡೀಲರ್‌ಶಿಪ್‌: ವಾಹನಗಳನ್ನು ಇಷ್ಟಪಡುವವರಿಗೆ ಡೀಲರ್‌ಶಿಪ್‌ ಅತ್ಯುತ್ತಮ ಕರಿಯರ್‌ ಆಯ್ಕೆಯಾಗಿದೆ. ಇದು ಅತ್ಯುತ್ತಮ ಆದಾಯ ತರುವ ಉದ್ಯೋಗವೂ ಹೌದು. ಆದರೆ, ಹೂಡಿಕೆ ಮಾಡಲು ಅಥವಾ ಡೀಲರ್‌ಶಿಪ್‌ ಪಡೆಯಲು ಒಂದಿಷ್ಟು ಹಣ ನಿಮ್ಮಲ್ಲಿರಬೇಕು. ಕಾರು ಡೀಲರ್‌ಶಿಪ್‌ ಎಂದರೆ ಕೇವಲ ಮಾರಾಟಕ್ಕೆ ಮಾತ್ರ ಸೀಮಿತವಲ್ಲ. ವಾಹನಗಳ ನಿರ್ವಹಣೆ, ಸವೀರ್‍ಸ್‌, ಬಿಡಿಭಾಗಗಳ ಮಾರಾಟ ಇತ್ಯಾದಿಗಳ ಮೂಲಕವೂ ಅತ್ಯುತ್ತಮ ಆದಾಯ ಗಳಿಸಬಹುದು. ಬಿಸ್ನೆಸ್‌ ಮ್ಯಾನೇಜ್‌ಮೆಂಟ್‌ ಓದಿದವರಿಗೆ ಡೀಲರ್‌ಶಿಪ್‌ ಸೂಕ್ತ. ಸಾಮಾನ್ಯ ಪಿಯುಸಿ, ಪದವಿ ಪಡೆದವರೂ ಡೀಲರ್‌ಶಿಪ್‌ನಲ್ಲಿಯಶಸ್ವಿಯಾಗಿದ್ದಾರೆ.
ಸಾರ್ವಜನಿಕ ಸಂಪರ್ಕ: ನೀವು ಅತ್ಯುತ್ತಮ ಬರಹಗಾರರು, ಇವೆಂಟ್‌ ಮ್ಯಾನೇಜ್‌ಮೆಂಟ್‌ ಮತ್ತು ಪ್ಲ್ಯಾನಿಂಗ್‌ ಕೌಶಲ ಹೊಂದಿದ್ದರೆ ಪಬ್ಲಿಕ್‌ ರಿಲೇಷನ್‌ ವಿಭಾಗವನ್ನು ಆಯ್ಕೆ ಮಾಡಿಕೊಳ್ಳಬಹುದು. ಪ್ರಮುಖ ಬ್ರ್ಯಾಂಡ್‌ಗಳೊಂದಿಗೆ ಕಾರ್ಯನಿರ್ವಹಿಸಬಹುದು. ಮಾಧ್ಯಮ ಮತ್ತು ಬ್ರ್ಯಾಂಡ್‌ಗಳ ಜೊತೆ ಸಂಪರ್ಕಸೇತುವಾಗಬಹುದು.
ಹಣಕಾಸು ವಿಶ್ಲೇಷಕರು: ಬಹುತೇಕರು ವಾಹನವನ್ನು ಬ್ಯಾಂಕ್‌ ಸಾಲದ ಮೂಲಕ ಪಡೆಯುತ್ತಾರೆ. ಜೊತೆಗೆ, ವಾಹನ ಕಂಪನಿಗಳೂ ಮಾರುಕಟ್ಟೆಯನ್ನು ಅತ್ಯುತ್ತಮವಾಗಿ ಅರಿತಿರುವ ಫೈನಾನ್ಶಿಯಲ್‌ ಅನಾಲಿಸ್ಟ್‌ಗಳನ್ನು ನೇಮಕ ಮಾಡಿಕೊಳ್ಳುತ್ತವೆ.
ಆಟೋಮೊಬೈಲ್‌, ಕಾರು, ಬೈಕ್‌ ವಿಮರ್ಶೆ, ಸುದ್ದಿಗಳನ್ನು ನೋಡಲು ಕರ್ನಾಟಕ ಬೆಸ್ಟ್‌ ಆಟೋಮೊಬೈಲ್‌ ವಿಭಾಗಕ್ಕೆ ಭೇಟಿ ನೀಡಿ
