ನೀನು ನೀನಾಗಿದ್ದು ಯಾವಾಗ?
ಕೇಳಿತು ಮನಸ್ಸು ಕುಟುಕುತ್ತಲೇ
ಗೊತ್ತೇ ಇಲ್ಲ ನನಗೆ ನಾನು ಯಾವಾಗ ನಾನಾಗಿದ್ದೆ…?
ಮರೆತೇ ಹೋಗಿದ್ದೇ ನನ್ನ ನಾ..
ಮಿತಿಯಿಲ್ಲದ ಸಂಬಂಧಗಳ ಸುಳಿಯೊಳಗೆ
ಮುಚ್ಚಿದ ಕೋಣೆಯ ಬಾಗಿಲೊಳಗೆ!
***
ತಂದ ಬಂಗಾರ ಕಡಿಮೆ ಎಂದು ಮೂದಲಿಸಿದವರನ್ನು
ಚೆಂದವಿಲ್ಲವೆಂದು ಆಡಿಕೊಂಡವರನ್ನು
ಮಾತು ಮಾತಿಗೂ ಮುನಿಯುವ ಗಂಡನನ್ನು
ನನ್ನೊಳಗಿನ ಕನಸನ್ನು ಕೊಂದವರನ್ನು
ಮರೆವಿನ ಪಟ್ಟಿಗೆ ಸೇರಿಸಿ ನಗುವಿನ ಮುಖವಾಡ ಕಟ್ಟಿಕೊಂಡಿದ್ಯಾವಾಗ?
***
ಒಗ್ಗರಣೆ ಸೌಟಿನೊಳಗಿನ ಸಾಸಿವೆ ಪಟ್ಟೆಂದು ಸಿಡಿದಾಗ,
ಬಚ್ಚಲ ಒಲೆಗೆ ತುಂಬಿದ ತರಗಲೆ ಗಳ್ಳೆಂದು ಉರಿದಾಗ
ಏನನ್ನೋ ಕಳೆದುಕೊಂಡಿದ್ದೇನೆ ಎಂದು ತಳಮಳಿಸುತ್ತೇನೆ
ಸಿಡಿದು ಉರಿಯಬೇಕಿದ್ದ ಮನವನ್ನು ಹತ್ತಿಕ್ಕಿಕೊಂಡಿದ್ದಕ್ಕೆ
ಮಾತು- ನಗುವಿನ ಸ್ವಾತಂತ್ರ್ಯವನ್ನು ಗಿರವಿ ಇಟ್ಟಿದ್ದಕ್ಕೆ ಮರಗುತ್ತೇನೆ
ಮತ್ತದೇ ಕುದಿವ ನೀರಿನ ಜತೆ ಬಿಸಿ ಕಣ್ಣೀರಿನ ಅಭ್ಯಂಜನ ಮಾಡಿ ಕಳಚಿಟ್ಟ
ಭಾವನೆಯ ಅಂಗಿಗಳನ್ನೆಲ್ಲಾ ತೊಟ್ಟು ಗರತಿಯಾಗುತ್ತೇನೆ
